لفتات زوجيه

موضوع: لفتات زوجيه الأحد أغسطس 16, 2009 11:48 pm

صباحكم \مسائكم
سعااااااااااااادة
ليالي رومنسية وشموع وحركات سويناها وانبسطنا...
رومنسيات خفيفة يومية كمان ماقصرنا فيها...
بس في شي أهم...شي مهم لنا أولا ولأزواجنا ولتوطيد علاقتنا بأزواجنا...يعني شي لزوم الاستقرار...وأنا أشوفو من العشرة الطيبة...
الحركات الرومانسية...اختلفوا الرجال من ناحية تقبلهم لها...أما اللي راح أتكلم عنها اليوم...مافي رجال مايتقبلها...ولها اثرها في التقريب بين الزوجين...

وهي اللفتات الزوجية..
وأقصد فيها انو الوحدة تشوف زوجها محتاج شي معين...وذأه الشي اللي هو محتاجه...مالو داعي ينطلب من الزوجة...بس هو مرة مهم للزوج...
وببعض الأوقات الزوج بنفسو مايعرف انو يحصل عليه من زوجته...و مايعرف انها هي السند والحل له...ومايجي ببالو انو يطلب منها...
وهنا يجي دور الزوجة انها تكون دقيقة الملاحظة وسريعة البديهة...وماتتأخر عن زوجها...
لأنكم عارفين...بعض الأشياء اذا طُلبت فقدت معناها...
يعني لو زوجك طلبها منك...ماحيكون طعمها وتأثيرها زي لو انتي من نفسك قدمتيها...
وراح أذكرلكم بعض هذي اللفتات...
## حبيب القلب جالس يقص أظافره...وأكثر الرجال يعانو بذأه الموقف...تشوفيهم لكأنهم بمصارعة حرة...تعالي عندو بهدوء...خوذي المقص من يده...
وقومي بالواجب...عاد نحنا الحريم شاطرين بهذي الشغلات...
## خرج للدوام الصباح وهو تعبان أو مصدع أو مرشح...حلو انك تتصلي عليه بعد مايوصل بساعة...عشان تتطمني عليه...هو ماراح يقوللك اتصلي عليّا واتطمني...بس أكيد لو اتصلتي حتتركي أثررائع بنفسو...
## جالس ع النت...تعالي من وراه ودلكي أك**** ورقبته لدقايق...أو حضريلو كوب نسكافيه أو كابتشينو أو كوفي عربي مع قطعة حلو أو تشوكليت...
بس لو كان ع التشات أو من حقون حركات النص كم...خليه ينكسر ظهرو ويتشنج كمان ههههه.
## حلو انك توفري بكل شهر مبلغ بسيط بلا ماتخبريه...ولو حسيتيه مزنوق ماديا قدميه له...أو لو كان نفسو بشي...تقدري تشتريه له...
## يتفرج ع التي في...ومتابع بحماس...أو يقرا كتاب أو جريدة...قدميلو مشروب يحبو بلا مايطلب...حسسيه انك مبسوطة بالشي اللي يبسطه...
## لاحظتي انو متضايق والبوز شبر...اجلسي جنبه...امسكي يده...وسمعيه من الحكي اللي يرفع المعنويات...قوليلو حبيبي والله الدنيا ماتسوى
انك تزعل عشانها...حياتي انتا كلو ولا زعلك...الوسيم ذأه مولايق عليه التكشير....
بس كذا بدون تحقيق وشلة كونان...
## جاء بعد شفت ويوم دوام طويل...تعبان وحيلو مهدود...دخل يبغى ينام...ادخلي معاه...اجلسي ع طرف السرير...ودلكي رجوله بشويش...
خمس دقايق واخرجي...

## كان يبغى ينام...ادخلي عليه...وغطيه...أو عدلي اللحاف...زي ماتسوي للبيبي...وبوسيه ع جبينه...واتأكدي انو يكون صاحي...بس انتي سوي نفسك انك تفكريه نايم...
## خرج من البيت وهو زعلان...حتى لو كان زعلان منك لاسمح الله...اتصلي عليه بعد خروجه بفترة...اذا رد عليكي قوليلو بس كنت أبغى أتطمن عليك...
واذا اداكي بيزي...ارسليلو مسج...قوليلو فيه...كنت خايفة عليك...بس الحمد لله طمنتي لما اديتلي بيزي...
## زوجك يدرس وعندو اختبار...أو موظف وعندو شغلة مهمة...أو مدير وعندو اجتماع...أوبيزنس مان وعندو صفقة...
اتصلي عليه بوقت تكوني متأكدة انودوبو مخلص...واسأليه اش صار معاه؟؟؟اتطمني عليه وع خطواته...سوي نفسك انك دووووووبك صاحية من النوم...وانك صحيتي مخصوص عشان تتطمني عليه...
مو انتي بوادي وهو بوادي...حسسيه انو اللي يهمه كمان يهمك انتي...
## كنتو جالسين...فجأة هو صار يدلك راسو وهو منزعج...أو حط يدو ع كتفه أو ظهره وكأنو يتألم...ع طول اسأليه وانتي خايفة عليه موت...قولي:
اش فيك ياروحي...تعبان...ياااااااااااق لبو انتا سلامتك....في شي يآلمك...حسسيه انو قلبك يتقطع عليه وانك خايفة عليه...
رغم انو كل الشغلة شوية صداع...بس حلو تحسسيه باهتمامك وخوفك عليه...
ترا فيه رجال كثير يسووا هذي الحركات بالقصد...يحبوا يلفتوا النتباه...يعني مجرد دلع...واللي يفقع القلب...انو الزوجة ولا هي هنا...
## كنتو تاكلو...أو تتفرجوا ع التي في...فجأة التفتي عليه...وركزي نظرك بعيونه...لثواني بس...بعدها ع طول ابتسمي له...كأنك جالسة
تستمتعي وتتلذذي بالنظر فيه...وكأنك تقوليله أنا معجبة فيك...أنا مبسوطة انك انتا زوجي من بد رجال الكون...
## استحمى!!!...قدميله كوب مويا...وقوليلو عشان ماتتعب حبيبي...

## روحتي المكتبة...افتكريه بكتاب يوافق ميوله...يعني هو اللي يصرف وهو اللي يوصل...مايستحق انك تفتكريه بشي...
## الصباح وهو بالدوام...اتصلي بيوم ع المطعم اللي هو يحبه أو كودو...واطلبي فطور...وأرسليه له ع الدوام...وفاجئيه بفطورحلو...
خليه يحس بالتميزقدام أصحابه...وانك افتكرتيه واهتميتي فيه...
## لوجاب اغراض للبيت...وكان بينهم شي تحبيه حتى ولو ****ة...بينيلو الفرحة...مثلا:
انتي تحبي الكرز...وجاب بيوم أغراض للبيت وبينهم كرز...ع طول طيري عندو....واديلو بوسة ع خده....وقولي وااااااااااااو حبيبي...حياتي انتا
لكأنك كنت عارف اني مشتهيتو...مهما كان الشي صغير و****ة...بالغي في انفعالك في التعبير عن فرحتكي فيه...

## راح الصالون...أوكي...بعد مايرجع...علقي ع شكله....أو لوكه الجديد...قولي:ماشاء الله حبيبي تجنن...شكلك مرة حلو...حلوة قصتك الجديدة...
تذكري انو نحنا لما نروح الصالون...كيف ننبسط لما أزواجنا يعلقوا ع اللوك الجديد...حتى لو عملتي ماسك...تحبي انو زوجك يلاحظ ويعلق...
والدليل انتبهوا لأغلب مواضيع العناية بالبشرة...لما وحدة تبغى توصف ماسك انو قدايه غيرها...ع طول تقول حتى زوجي لاحظ...
معناه انو الملاحظة دليل الاهتمام...صح؟؟؟
## لبس واتأنتك...وطلع عريس لؤطة...قوليلو انو مرة شيك...وانك فخورة باهتمامه بأناقته...ومن ذأه الحكي اللي كلو ضرب فراشي...
## وصلك بيت أهلك مثلا بالويك اند...بعد كم ساعة من جلستك عند أهلك...ارسليلو مسج...خبريه فيه...انك اشتقتيله وانو وحشك موت...
وانو مهما كثروا الناس حولك...فيظل هو الأهم...هو اللي تفتقديه...حتى لو بعدتي عنو ثواني...باختصار...انتا كل الناس وكل الناس منّهم انتا...
مو ماحسبتي على الله...جاتك من السما الفكة من شكلو...
## عوديه انو وقت خرجته...توقفي معاه عند الباب وتجسلي توصيه...مثلا: انتبه حبيبي لاتبرد...لاتسرع قلبووالله سلامتك بالدنيا...حياتي انتا طمني عليك......ومن هذي التوصيات اللي تبين اهتمامك له...وخوفك عليه...

ترا هذي اللفتات كلها أشياء صغييييييرة وبنظر البعض ****ة بس والله تحتاجلها قوة ملاحظة ...تلاحظي هو اش يحتاج...
حتى تلاقي الكبار يقولو فلان رمة أو أهبل...يعني انك تلمحي ع شغلة قدامه ولا يبادرهوبتقديمها...
أو تقولي فلان خسيس...يعني تكوني بموقف يستلزم انو هو يبادر بالمساعدة بس لاحياة لمن تنادي...لازم تقوليها له صريحة...
ونحنا مانبغى نكون كذا مع أقرب الناس لنا وأحبهم ع قلوبنا...أزواجنا ربنا يسخرهم لنا

مررررررررره يجنن الموضوع

تسلمي ياحلوه

امبراطوره يا سيده المميزه يا سلام ما طرحته يادك وليس غريب هذا الشي منك

لان انسانه ملهمه ورقيقه با احساسك وهذا الشي اذا بدر من الزوجه

ابصم با العشره انها راح تكسب حب ورضاء زوجها غصب عنه

/

بالفعل محتآجين مثل هذه اللفتآآآآآآآآآآآآآت بشكل جميل ..

لكن البعض يستغلها بشكل مو مكانها ,, فعشآن كذا تحصل الخلافآت ..

طرحك شيق , والكلمات فية رآقية ..

آستفتدت منه الكثيــــــــــــــــــر .. بس بآقي التطبيق ..!!

لك حبي

/